အပိုဝင်ငွေရစေတဲ့ ဗိုလ်စားပဲကို ဘယ်လိုစနစ်တကျစိုက်ပျိုးမလဲ
အမေရိကန်တောင်ပိုင်းနဲ့ အလယ်ပိုင်းကဖြစ်ပါတယ်။ စပိန်လူမျိုးတွေကနေတစ်ဆင့် ဥရောပ၊ အာဖရိက၊ အာရှနိုင်ငံတွေကို ရောက်လာတာဖြစ်ပါတယ်။
စိုက်ပျိုးသည့်ဒေသ
မြန်မာနိုင်ငံအနှံ့အပြားနဲ့ ကမ္ဘာ့အနှံ့အပြားမှာ စိုက်ပျိုးကြပါတယ်။
အမျိုးအစား
-------------
အပင်ပုံစံကိုကြည့်ပြီး (၃)မျိုး ခွဲခြားနိုင်ပါတယ်။ အပင်ပုမျိုးကတော့ အဆစ်တိုပြီး အပင်ရှည်မျိုးက အပင်ပုမျိုးထက် အဆစ်ရှည်ပါတယ်။ ကျန်တစ်မျိုးက တိုင်ထောင်မျိုးဖြစ်ပါတယ်။ ပုံမှန်အားဖြင့် ချုံပုတ်မျိုးနဲ့ နွယ်တက်မျိုးဆိုပြီးတော့ (၂)မျိုးခွဲခြားကြပါတယ်။ အဲဒီ(၂)မျိုးကို ထပ်ပြီးတော့ အတောင့်ရဲ့ပုံသဏ္ဍာန် ၊အရောင်ပေါ်မူတည်ပြီးတော့ အလုံး၊အပြား၊အတိုတရှည်၊အစိမ်း၊အဝါ၊ခရမ်းရောင်စသဖြင့် ထပ်ပြီးခွဲခြားကြပါတယ်။
ရေမြေရာသီဥတု
--------------------
• သဲဆန်တဲ့မြေကနေ မြေစေးအထိ မြေအမျိုးအစားတော်တော်များများမှာ စိုက်ပျိုးလို့ရပါတယ်။ အချို့က ခဲမြေတွေမှာလည်း စိုက်ပျိုးကြပါတယ်။ တိုတောင်းတဲ့ရာသီမှာ အချိန်တိုအတွင်း စိုက်ချင်ရင် သဲဆန်တဲ့မြေမှာ စိုက်ပျိုးကြပါတယ်။မြေကောင်းရင် အထွက်ပိုကောင်းပါတယ်။ အရမ်းချဉ်တဲ့မြေတွေမှာ မဖြစ်ထွန်းပါ။ မြေချဉ်ငန်ဓာတ် (၅.၃-၆)အတွင်း ဖြစ်ထွန်းပါတယ်။
• အပင်ကြီးထွားဖို့နဲ့ အတောင့်ကောင်းကောင်း ဖြစ်ထွန်းဖို့ အေးတဲ့ရာသီကို လိုလားပါတယ်။ ဒါပေမယ့် အပူချိန် (၁၀)ဒီဂရီစင်တီဂရိတ်အောက်မှာ သီးပွင့်မှုကိုနှောင့်နှေးစေနိုင်ပါတယ်။အလွန်ပူတဲ့ရာသီ(သို့) မိုးအရမ်းများလွန်းရင်လည်း အပွင့်အသီးကို ကြွေစေပါတယ်။ အသင့်တော်ဆုံးအပူချိန်ကတော့ ၁၅ဒီဂရီစင်တီဂရိတ်အတွင်းဖြစ်ပါတယ်။
မျိုးစေ့နှုန်းထား
--------------------
ချုံပုတ်မျိုး (၄၀-၅၀)ကီလိုဂရမ် / (၁)ဧက
တိုင်ထောင်မျိုး (၁၂-၁၅)ကီလိုဂရမ် / (၁)ဧက
မြေသြဇာနှုန်းထား
--------------------
• တစ်ဧကအတွက် နွားချေး (၁၀)တန်၊ယူရီးယား (၂၂၄)ပေါင်၊တီစူပါ (၁၁၃)ပေါင်၊ပိုတက်ရှ် ( ၅၆)ပေါင် လိုအပ်ပြီး နွားချေး၊တီစူပါ၊ပိုတက်ရ်ှနဲ့ ယူရီးယား (၁၁၂)ပေါင်ကို မစိုက်ခင် မြောင်းထဲထည့်ပြီး ကျန်ယူရီးယား (၁၁၂)ပေါင်ကို ပေါင်းလိုက်မြေဆွချိန်မှာ ထည့်သွင်းပေးရပါမယ်။ လုပ်အားတတ်နိုင်ရင် မြေသြဇာကို မျိုးစေ့ချချိန်မှာ အစေ့ရဲ့ ပတ်လည်(၃)လက်မခန့်အကွာမှာ ချပေးပါ။ မဂ္ဂနီဆီယမ်နဲ့ သွပ်ဓာတ်ချို့တဲ့ရင် အသီးမှာ ပရိုတင်းပါဝင်မှုကိုလျော့နည်းစေပါတယ်။ မဂ္ဂနီစီယမ်ဓာတ်လိုအပ်ရင် အပင်ရဲ့အောက်ပိုင်းအရွက်တွေရဲ့ နုတ်ခမ်းပတ်လည်မှာ ဝါလာတာကို တွေ့ရနိုင်ပါတယ်။
• ဒုတိယအကြိမ်မြေသြဇာကျွေးတာကို တိုင်ထောင်ပဲမှာပဲ လိုအပ်ပြီးတော့ ချုံပုတ်မျိုးဟာ သက်တမ်းအရမ်းတိုတဲ့အတွက် ထပ်ထည့်ပေးစရာမလိုပါ။
မြေပြုပြင်ခြင်း
---------------
ထွန်ရေးကောင်းတဲ့ထိ မြေကို အထူးတလည်ပြင်ပေးစရာမလိုပါ။ ထွန်ရေးအသင့်အတင့်ရရင် လုံလောက်ပါတယ် ရေမဝပ်တဲ့မြေကို ရွေးချယ်ရပါမယ်။
စိုက်ပျိုးခြင်း
--------------
• မျိုးစေ့ချတဲ့အချိန်မှာ အစိုဓာတ်အရမ်းများရင် မျိုးစေ့တွေပုပ်သွားနိုင်ပါတယ်။နေသာတဲ့နေ့၊နောက်နေ့တွေမျာ မိုးမရွာဘူးလို့ ယူဆနိုင်မှ စိုက်သင့်ပါတယ်။ မျိုးစေ့တွေ မြေသြဇာနဲ့ တိုက်ရိုက်ထိတွေ့ရင် ပုပ်လွယ်တဲ့အတွက် မျိုးစေ့ချပြီးမှ အစေ့ပတ်ဝန်းကျင်မှာ မြေသြဇာ ကျွေးသင့်ပါတယ်။
• နွယ်တက်မျိုးတွေကို တစ်တန်းနဲ့ တစ်တန်း (၃)ပေခြားပြီး တစ်ပင်နဲ့တစ်ပင် (၉)လက်မခြားစိုက်ပျိုးသင့်ပါတယ်။ နွယ်တက်ပင်အတွက် အနည်းဆုံး(၇)ပေလောက်ရှည်တဲ့ ဝါးတိုင်(သို့) သစ်သားတိုင်တွေကို အပင်ရဲ့အခြေတိုင်းမှာ တိုင်ထောင်ရင် အပင်အမြင့်(၉)လက်မလောက်မှာ ထောင်ပေးပါတယ်။ အချို့ကတိုင်တွေမြဲစေဖို့ အတန်းထဲမှာရှိတဲ့နီးကပ်တဲ့အပင်တွေရဲ့တိုင်ကို ကြက်ခြေခတ်ပြီး တိုင်တွေဆုံတဲ့နေရာမှာ ချည်ပေးရပါတယ်။
• ရေမဝပ်စေဖို့ စိုက်တန်းတစ်ခုနဲ့ တစ်ခုကြား ရေနုတ်မြောင်းလုပ်ထားဖို့လိုပါတယ်
• ဝါးရှားတဲ့ဒေသတွေမှာ သက်ကြီးပြောင်းဖူးမျိုးတွေနဲ့ရောပြီး စိုက်ပျိုးကြပါတယ်။ ပြောင်းဖူးပင်ပေါ်ကို နွယ်တွေတက်တဲ့အတွက် တိုင်ထောင်ပေးစရာမလိုတော့ပါ။
• ချုံပုတ်မျိုးတွေကို တစ်တန်းနဲ့တစ်တန်း (၂)ပေခြားပြီး တစ်ပင်နဲ့တစ်ပင် (၂)ပေခွာစိုက်ကြပါတယ်။ မိုးရာသီမှာ ဇွန်-စက်တင်ဘာလအထိ စိုက်ကြပြီး ဒုတိယအကြိမ် ဇန်နဝါရီ-ဖေဖော်ဝါရီလအထိ စိုက်ပျိုးကြပါတယ်။ တောင်ပေါ်ဒေသတွေမှာ မတ်လ-မေလဆန်းအထိ စိုက်ပျိုးကြပါတယ်။ ရာသီဥတု သင့်တင့်တဲ့ဒေသတွေမှာ တစ်နှစ်ပတ်လုံးစိုက်ပျိုးနိုင်ပြီး နွေရာသီမှာစိုက်ရင်တော့ အထွက်လျော့နိုင်ပါတယ်။
အပင်ပြုစုခြင်း
-----------------
ပေါင်း(၂)ကြိမ်လိုက်ပေးရင် လုံလောက်ပါတယ်။ ခြောက်သွေ့တဲ့ရာသီဒဏ်
ကို ခံနိုင်ရည်ရှိပေမယ့် ရက်ရှည်ခြောက်သွေ့က ရေသွင်းပေးဖို့လိုပါတယ်။
ပဲသံချေး၊ ပဲမှဲ့ပြောက်စွန်းရောဂါ၊ ဘက်တီးရီးယားရွက်ခြောက်၊ ရွက်နူရောဂါများ၊
ကျရောက်တတ်ပါတယ်။ ခူမွှေးစုပ်၊ ပိုးကျိုင်းငယ်၊ ပဲစားကြမ်းပှိးနဲ့ ပျပိုးတွေကျနိုင်ပါတယ်။
ထိသေ၊ စားသေပိုးသတ်ဆေး၊ မှိုသတ်ဆေးတွေသုံးပြီး ကာကွယ်နိုင်ပါတယ်။
ခူးယူခြင်း
------------
အပင်ပေါက်ပြီး (၇၅)ရက်မှစပြီး အသီးများခူးဆွတ်နိုင်ပါတယ်။ ပဲသီးတွေကို
အရွယ်မရောက်မီ အစေ့နုသေးသောအချိန်မှာ ခူးဆွတ်ပါတယ်။ ပန်းပွင့်ပြီး
(၂ - ၃)ပတ်အကြာမှာ စတင်ဆွတ်ခူးနိုင်ပါတယ်။ ပင်ထောင်မျိုး တစ်ဧကလျှင်
(၈၀၀ - ၉၀၀)ပိဿာ၊ တိုင်ထောင်မျိုး တစ်ဧကလျှင် (၂၀၀၀)ပိဿာကျော်
အထိ ထွက်ရှိနိုင်ပါတယ်။
ရွှေသီးနှံ
Comments
Post a Comment